काठमाडौं । नेकपा (एमाले) कोशी प्रदेश संसदीय दलले प्रमुख सचेतकको जिम्मेवारी रमेश कुमार बस्नेतलाई दिएको छ । दलका नेता तथा कोशी प्रदेशका मुख्यमन्त्री हिक्मत कुमार कार्कीले बस्नेतलाई उक्त पदमा नियुक्त गरेका हुन् ।

सुनसरी निर्वाचन क्षेत्र नं. १ (१) बाट प्रदेश सभा सदस्यमा निर्वाचित बस्नेतलाई संगठनात्मक समन्वय तथा संसदीय कार्य सञ्चालनको जिम्मेवारी दिइएको हो ।

यसअघि प्रमुख सचेतक रहेका विदुर कुमार लिंथेप आर्थिक मामिला तथा योजना मन्त्री बनेपछि उक्त पद रिक्त रहेको थियो । लामो समयसम्म नयाँ प्रमुख सचेतक नियुक्त हुन नसक्दा संसदीय कामकाज सचेतक ललिता कुमारी चौधरीमार्फत सञ्चालन हुँदै आएको थियो ।

२०७९ को निर्वाचनपछि एमाले कोशी प्रदेश संसदीय दलको प्रमुख सचेतकमा प्रारम्भमा रेवतीरमण भण्डारीलाई जिम्मेवारी दिइएको थियो । उनी मन्त्री बनेपछि उक्त पद विदुर कुमार लिंथेपलाई हस्तान्तरण गरिएको थियो । लिंथेप पनि पछि मन्त्री बनेपछि पद रिक्त रहँदै आएको थियो ।