विराटनगर । नेपाली कांग्रेसका कोशी प्रदेश संसदीय दलका नेता उद्धव थापाले प्रमुख प्रतिपक्षमा रहे पनि प्रदेश सरकारका राम्रा काममा सहयोग गर्ने बताएका छन्।

बुधबार प्रदेशसभा बैठकमा बोल्दै थापाले प्रतिपक्षको भूमिका सरकारको विरोध गर्नु मात्र नभई सही बाटो देखाउने र आवश्यक सहयोग गर्ने पनि भएको बताए। सशक्त प्रतिपक्ष लोकतन्त्रका लागि आवश्यक रहेको उनको भनाइ थियो।

थापाले संघीय सरकार जनताका आधारभूत समस्या समाधान गर्न असफल भएको आरोप लगाए। महँगी, मल तथा ग्यास अभाव र करको भारप्रति सरकार गम्भीर हुनुपर्ने उनले बताए।

उनले कोशी प्रदेशको बजेट सन्तुलन, सिलिचोङका पहिरोपीडितको व्यवस्थापन तथा सुनसरीको धार्मिक–साम्प्रदायिक विवाद समाधान गर्न सरकारको ध्यानाकर्षण गराए। प्रदेशको विकास र समृद्धिका लागि प्रतिपक्षमा रहे पनि सरकारसँग सहकार्य गर्न कांग्रेस तयार रहेको थापाले बताए।