काठमाडौँ । नेपाली कांग्रेसको १५औँ महाधिवेशनसम्बन्धी प्रक्रिया अघि नबढाउन माग गर्दै पूर्वसभापति शेरबहादुर देउवा पक्षले सर्वोच्च अदालतमा पूरक निवेदन दर्ता गराएको छ।

विशेष महाधिवेशनसम्बन्धी विवादमा सर्वोच्च अदालतले पुनरावलोकनका लागि निस्सा प्रदान गरेपछि उक्त विषय न्यायिक निरूपणको प्रक्रियामा रहेकाले त्यसको अन्तिम टुंगो नलागेसम्म महाधिवेशनको प्रक्रिया अघि बढाउन नहुने जिकिर देउवा पक्षले गरेको छ।

सर्वोच्च अदालतका सूचना अधिकारी तथा उपरजिस्ट्रार निराजन पाण्डेका अनुसार निवेदनमाथि आगामी ११ भदौमा सुनुवाइका लागि पेशी तोकिएको छ। देउवा पक्षका तर्फबाट अधिवक्ता श्रवणकुमार देवले वारेसमार्फत निवेदन दर्ता गराएका हुन्।

कांग्रेसको विशेष महाधिवेशनसम्बन्धी विवादमा सर्वोच्च अदालतले पुनरावलोकनको अनुमति दिएसँगै उक्त विषय पुनः अदालतमा विचाराधीन बनेको छ। यही अवस्थालाई आधार बनाउँदै देउवा पक्षले पुनरावलोकन मुद्दाको अन्तिम टुंगो नलागेसम्म १५औँ महाधिवेशनको प्रक्रिया अघि नबढाउन आदेश माग गरेको हो।