काठमाडौँ । अमेरिकी राष्ट्रपति डोनाल्ड ट्रम्पले फकल्यान्ड टापु विवादमा अमेरिकाको पुरानो नीतिमा पुनर्विचार हुन सक्ने संकेत दिएपछि अर्जेन्टिना र बेलायतबीचको दशकौँ पुरानो विवाद फेरि चर्किएको छ।

अर्जेन्टिनाका राष्ट्रपति हाभियर मिलेईले फकल्यान्डलाई आफ्नो देशको भूभाग दाबी गर्दै टापु आसपास तेल उत्खनन गरिरहेका कम्पनीमाथि कडा प्रतिबन्ध लगाउने योजना घोषणा गरेका छन्। उनले अर्जेन्टिनाको अनुमति बिना तेल उत्खनन अघि बढिरहेको भन्दै तत्काल कदम चाल्नुपर्ने बताएका छन्।

बेलायतले भने फकल्यान्डप्रतिको आफ्नो प्रतिबद्धता अडिग रहेको जनाएको छ। बेलायती विदेशमन्त्री एड मिलिब्यान्डले टापुका बासिन्दाको आत्मनिर्णयको अधिकार अन्तर्राष्ट्रिय कानुनमा आधारित रहेको बताएका छन्।

सन् १९८२ मा फकल्यान्डलाई लिएर अर्जेन्टिना र बेलायतबीच युद्ध भएको थियो। अर्जेन्टिनाले अझै पनि टापुमाथि आफ्नो सार्वभौमसत्ताको दाबी गर्दै आएको छ। सन् २०१३ को जनमतसंग्रहमा भने ९९ प्रतिशतभन्दा बढी फकल्यान्डवासीले बेलायती शासनमै रहने पक्षमा मतदान गरेका थिए।

ट्रम्पको पछिल्लो अस्पष्ट अभिव्यक्ति, तेल उत्खनन र अर्जेन्टिनाको नयाँ प्रतिबन्ध योजनाले दक्षिण एट्लान्टिकको पुरानो विवादलाई पुनः अन्तर्राष्ट्रिय बहसमा ल्याएको छ।