काठमाडौं । अमेरिकाका विद्यालयमा विद्यार्थीको पढाइ र गणितीय क्षमता कमजोर बन्दै गएपछि शिक्षा सुधारका लागि ३० वटा उपाय सुझाइएको छ।

३७ जना शिक्षाविद्, अर्थशास्त्री तथा शिक्षा विज्ञले गरेको अध्ययनले कमजोर विद्यार्थीलाई ३–४ जनाको सानो समूहमा पढाउने, वैज्ञानिक विधिबाट पढ्न सिकाउने र गुणस्तरीय पाठ्यक्रम लागू गर्ने उपायलाई प्रभावकारी मानिएको छ।

रिपोर्टअनुसार पछिल्लो एक दशकमा अमेरिकाका ८३ प्रतिशत विद्यालयमा राम्रोसँग पढ्न नसक्ने वा सामान्य गणितीय समस्या समाधान गर्न नसक्ने विद्यार्थीको सङ्ख्या बढेको छ।

शिक्षा सुधारका लागि सबै शिक्षकको तलब बढाउनुभन्दा आवश्यकता बढी भएका विद्यालयमा दक्ष शिक्षकलाई अतिरिक्त पारिश्रमिक वा बोनस दिने सुझाव पनि दिइएको छ।

त्यस्तै, कक्षाकोठामा स्मार्टफोनको प्रयोग रोक्दा विद्यार्थीको ध्यान पढाइमा केन्द्रित हुन सक्ने बताइएको छ। अर्कोतर्फ, विद्यार्थीलाई ल्यापटप वा ट्याब्लेट दिँदैमा मात्र शिक्षाको गुणस्तर सुधार नहुने रिपोर्टले जनाएको छ।

रिपोर्टमा मिसिसिपी राज्यको उदाहरण दिँदै वैज्ञानिक पढाइ विधि, गुणस्तरीय पाठ्यक्रम र विद्यालयको जवाफदेहिताले शैक्षिक उपलब्धि सुधार गर्न सहयोग गरेको उल्लेख छ।

समग्रमा, विज्ञहरूले शिक्षा सुधारका लागि ठूलो बजेट वा प्रविधिभन्दा दक्ष शिक्षक, प्रभावकारी शिक्षण विधि, गुणस्तरीय पाठ्यक्रम र विद्यार्थीलाई आवश्यकताअनुसार दिइने लक्षित सहयोगलाई प्राथमिकता दिन सुझाव दिएका छन्।