काठमाडौं । आन्तरिक वायुसेवाको दायित्वसम्बन्धी विधेयकमा परेका १५ संशोधन प्रस्तावमध्ये १३ वटा समावेश गरिएको पर्यटन मन्त्री खड्गराज पौडेलले बताएका छन्।

उनले विधेयकले हवाई भाडा वृद्धि नगर्ने र यात्रु, चालक दलका सदस्य तथा तेस्रो पक्षको सुरक्षालाई प्राथमिकतामा राख्ने दाबी गरेका छन्।

शुक्रबार राष्ट्रिय सभामा ‘आन्तरिक वायुसेवाको दायित्व सम्बन्धमा व्यवस्था गर्न बनेको विधेयक, २०८३’ माथिको छलफलमा मन्त्री पौडेलले सांसद र विधान व्यवस्थापन समितिबाट प्राप्त सुझाव समेटेर विधेयकलाई थप स्पष्ट र व्यावहारिक बनाइएको जानकारी दिएका हुन्।

उनका अनुसार विधेयकका प्रावधानमा दोहोरो अर्थ नलागोस् र सर्वसाधारणले सहजै बुझ्न सकून् भन्ने उद्देश्यले भाषिक सरलीकरणमा ध्यान दिइएको छ।

सुरक्षित र भरपर्दो हवाई सेवा सुनिश्चित गर्न सरकार प्रतिबद्ध रहेको भन्दै उनले विधेयक कार्यान्वयनको तयारी तत्काल सुरु गरिने बताएका छन्।

छलफलमा सांसदहरूले उठाएको प्रचारप्रसारको विषय सम्बोधन गर्न राष्ट्रव्यापी सचेतना योजना अघि बढाउने प्रतिबद्धता पनि मन्त्री पौडेलले व्यक्त गरेका छन्।

यात्रुलाई आफ्ना अधिकार र वायुसेवा कम्पनीको दायित्वबारे विभिन्न माध्यमबाट जानकारी दिने मन्त्रालयको तयारी रहेको उनले बताएका छन्।

शुक्रबारको बैठकमा विधेयकमाथिको सैद्धान्तिक र दफावार छलफल सम्पन्न भएको छ।