काठमाडौं । ऊर्जामन्त्री विराजभक्त श्रेष्ठले उद्योगीहरूसँगको बक्यौता असुलीमा कडाइ गर्न विद्युत् प्राधिकरणलाई निर्देशन दिएका छन् ।

शनिबार कुलेखानी जलाशयको निरीक्षण गर्न पुगेका मन्त्री श्रेष्ठले प्राधिकरणलाई यस्तो निर्देशन दिएका हुन् ।

उद्योगहरूलाई मागअनुसार बिजुली पाउने अवस्था सुनिश्चित गर्न र बक्यौता असुलीमा कडाइ गर्न उनको निर्देशन छ । ”हेटौँडा औद्योगिक क्षेत्रमा ४० मेगावाटको बिजुलीको माग भएको छ । यो मागको सम्बोधनका साथै बक्यौता भएका उद्योगहरूलाई परिपत्रमार्फत ताकेता गरौँ,” उनले भने ।

विद्युत् प्राधिकरणले सूचना प्रवाहको स्थितिमा सुधार गर्नुपर्ने बताए । विद्युत् आपूर्तिको समस्याका कारणले भन्दा समयमै सूचना नपाएका कारणले नागरिकमा आक्रोश बढिरहेको कुरालाई ख्याल गर्न उनको निर्देशन छ ।