सिन्धुली । सिन्धुलीको फिक्कल गाउँपालिका–६, नागथानस्थित मध्यपहाडी लोकमार्गमा यात्रुवाहक जिप दुर्घटना हुँदा ३ जनाको मृत्यु भएको छ भने ४ घाइते भएका छन् ।

नेपाल प्रहरीका अनुसार आइतबार बिहान करिब २ः३० बजे काठमाडौँबाट खोटाङतर्फ जाँदै गरेको को १ ज २९७६ नम्बरको यात्रुवाहक जिप सडकबाट करिब २०० मिटर तल सुनकोशी नदीमा खस्दा तीन महिलाको घटनास्थमै मृत्यु भएको हो ।

दुर्घटनामा परी घाएते हुनेमा ओखलढुंगाका अन्दाजी २९ वर्षीय आशिष बिष्ट रहेका छन् । उनी चालक हुन् । यस्तै खोटाङको दिक्तेल नगरपालिका–३ की ३८ वर्षीया सम्झना राई, राईकी १२ वर्षीया छोरी सिवानी राई र दिक्तेल नगरपालिका–१ का १३ वर्षीय अंकित विक रहेका छन् ।

दुर्घटनाको खबर प्राप्त हुनासाथ प्रहरी चौकी रत्नावती र प्रहरी चौकी खाङसाङबाट प्रहरी टोली घटनास्थलमा खटिएको थियो। दुर्घटनामा घाइते भएका चालकसहित चार जनालाई उद्धार गरी उपचारका लागि उदयपुरको घुर्मीस्थित जनसेवा हेल्थ सेन्टर प्रालिमा पठाइएको थियो । अवस्था गम्भिर भएपछि चारै जनालाई थप उपचारका लागि एम्बुलेन्समार्फत सिन्धुली जिल्ला अस्पताल पठाइएको प्रहरीले जनाएको छ ।

चालकको भनाइअनुसार दुर्घटनापछि तीन जना बेपत्ता रहेका छन्। उनीहरूको खोजी तथा उद्धारका लागि इलाका प्रहरी कार्यालय खुर्कोटबाट प्रहरी निरीक्षक विष्णुप्रसाद पौडेलको कमान्डमा सात जना र सशस्त्र प्रहरी बल विपद् व्यवस्थापन बेस खुर्कोटबाट सशस्त्र प्रहरी नायब निरीक्षक नरेन्द्र गुरुङको कमान्डमा गोताखोरसहितको टोली घटनास्थलमा खटिएको छ।

इलाका प्रहरी कार्यालय खुरकोटका अनुसार दुर्घटनाको यकिन कारण खुल्न सकेको छैन भने मृतक र बेपत्ता व्यक्तिहरूबारे थप विवरण आउन बाँकी रहेको छ । साथै घटनास्थलमा उद्धार तथा अनुसन्धान कार्य भइरहेको प्रहरीले जनाएको छ ।