काठमाडौं । तेस्रो संस्करणको नेपाल प्रिमियर लिग (एनपीएल) अन्तर्गत आज लुम्बिनी लायन्स र चितवन राइनोजबीच हुने भनिएको खेल वर्षाका कारण रद्द भएको छ । लगातारको वर्षाले मैदान खेल्न अयोग्य भएपछि खेल रद्द गरिएको नेपाल क्रिकेट संघ (क्यान) का सचिव पारस खड्काले जानकारी दिएका छन् ।

उनका अनुसार बिहीबार रातिदेखि परेको अविरल वर्षाका कारण कीर्तिपुरस्थित त्रिभुवन विश्वविद्यालय अन्तर्राष्ट्रिय क्रिकेट मैदान पूर्ण रूपमा भिजेको छ । खेल रद्द भएसँगै दुवै टोलीले एक–एक अंक बाँडेका छन् । यसैबीच, आजको दोस्रो खेलमा विराटनगर किङ्स र सुदूरपश्चिम रोयल्सबीच प्रतिस्पर्धा हुँदैछ । पूर्वनिर्धारित तालिकाअनुसार उक्त खेल अपराह्न ५ बजे सुरु हुने छ । तर, वर्षा जारी रहे दोस्रो खेलसमेत प्रभावित हुने सम्भावना रहेको छ ।