काठमाडौं । नेपाल आयल निगमले प्रस्ताव गरेको ग्यासको दोहोरो मूल्य प्रणालीप्रति नेपाल एलपी ग्यास उद्योग संघले असहमति जनाएको छ । संघले बिहीबार निगमलाई तीनबुँदे लिखित जवाफ बुझाउँदै ३० प्रतिशतको सट्टा हाललाई १० प्रतिशत ग्यास मात्र व्यावसायिक प्रयोजनका लागि छुट्याउन प्रस्ताव गरेको छ ।

संघले ग्यास परल मूल्यमा बिक्री गरी लक्षित वर्गलाई वाणिज्य बैंकमार्फत अनुदान उपलब्ध गराउन पनि माग गरेको छ । त्यस्तै, फरक तौलका सिलिन्डर ल्याउनुको सट्टा हाल प्रचलनमा रहेका १४.२ किलोका सिलिन्डरलाई घरायसी प्रयोजनका लागि रातो र व्यावसायिक प्रयोजनका लागि निलो रङमा छुट्याउनुपर्ने संघको प्रस्ताव छ ।

सरकारले फरक तौलका सिलिन्डर नै लागू गर्ने भए उद्योगहरूलाई तयारीका लागि कम्तीमा दुई वर्षको समय दिनुपर्ने संघका अध्यक्ष दिवान चन्दले बताए । संघले निगम र उद्योगीबीच २० फागुन २०८१ मा भएको सहमतिअनुसार मुनाफालाई प्रतिशतमा कायम गर्ने व्यवस्था पनि शीघ्र कार्यान्वयन गर्न माग गरेको छ ।