काठमाडौं । प्रहरी महानिरीक्षक (आईजीपी) बाट पदमुक्त गरिएका दानबहादुर कार्कीले पुनर्बहालीको माग गर्दै सर्वोच्च अदालतमा दायर गरेको रिट बिहीबार अध्ययनका लागि राखिएको छ। सरकारको निर्णय बदर गरी आफूलाई आईजीपीमा पुनर्बहाली गर्न माग गर्दै कार्कीले बिहीबार सर्वोच्च अदालतमा रिट पेस गरेका थिए। तर, रिट दर्ता भने भएको छैन।

कार्कीका तर्फबाट सहजीकरण गरेका अधिवक्ता टीका कुँवरका अनुसार मुख्य रजिस्ट्रारले रिट अध्ययनका लागि राखिएको जानकारी दिएका छन्। रिट दर्ता गर्ने वा नगर्ने विषयमा शुक्रबार टुंगो लाग्ने उनले बताए। कार्कीले आफूलाई सुनुवाइको मौका नदिई आधार र कारणबिनै गैरकानुनी रूपमा आईजीपीबाट हटाइएको दाबी गरेका छन्।

सरकारले कात्तिक १८ गतेको निर्णयअनुसार कार्कीलाई आईजीपीबाट पदमुक्त गर्दै प्रधानमन्त्रीको सुरक्षा सल्लाहकारमा नियुक्त गरेको थियो। त्यसपछि एआईजी डा. मनोजकुमार केसीलाई नयाँ प्रहरी महानिरीक्षक नियुक्त गरिएको थियो।

सरकारको उक्त निर्णय रोक्न र आफूलाई पुनर्बहाली गर्न कार्कीले सर्वोच्च अदालतसँग माग गरेका छन्।