विराटनगर । बाराको अमलेखगन्जबाट मोरङको विराटनगरका लागि डिजेल बोकेर ल्याइरहेको ट्यांकरबाट इन्धन चोरी भएको छ ।
सोमबार सुनसरीको इनरुवामा पार्किङ गरेर राखिएको अवस्थामा को १ ख २३३९ नम्बरको ट्यांकरबाट १ हजार ५८० लिटर डिजेल चोरी भएको हो ।

पार्किङ गरेर राखिएको ट्यांकर इनरुवा नगरपालिका–६, हलेसी चोकमा पुर्याएर चोरी गरेको फेला परेको प्रहरीले जनाएको छ ।

ट्यांकर भेटिए पनि त्यसबाट एक हजार ५८० लिटर डिजेल चोरी गरिएको पाइएको नेपाल आयल निगमको कोसी प्रादेशिक कार्यालयका प्रमुख पुष्कर कार्कीले जानकारी दिए ।
चालकलाई हिरासतमा राखेर प्रहरीले थप छानबिन गरिरहेको छ । जनकपुरको ओम ढुवानी सेवाको उक्त ट्यांकर विराटनगरबाट चलाइँदै आएको थियो ।
यस अघि गत असार ७ गते पनि मोरङको कञ्चनबारीस्थित चारैतिरबाट घेरिएको अग्लो पार्किङस्थलबाट २० हजार लिटर पेट्रोल भरिएको को १ ख ६१९० नम्बरको ट्यांकर पनि चोरी भएको थियो । त्यसबाट करिब ९७३ लिटर इन्धन चोरी भएको थिया भने ०७८ भदौ १३ गते पनि विराटनगरस्थित प्रादेशिक डिपोको पार्किङस्थलबाटै तेल भरिएको ट्यांकर चोरी भएको थियो । उक्त घटनामा प्रहरीले विराटनगर महानगरपालिका–४ का २६ वर्षीय श्रवणकुमार यादवलाई पक्राउ गरेको थियो ।
यसबाहेक ०७५ सालमा दुईपल्ट र ०७७ मा एकपटक पार्किङस्थलबाटै ट्यांकर चोरेर तेल गायब पारिएको थियो ।