काठमाडौं । पूर्वप्रधानमन्त्री शेख हसिनाको सम्भावित स्वदेश फिर्तीअघि बंगलादेशमा देशभर सुरक्षा व्यवस्था कडा पार्दै बुधबार सयौँ अर्धसैनिक जवान परिचालन गरिएको छ । पछिल्लो समय बम विस्फोट, आगजनी र झडपका घटना बढेपछि सरकारले सुरक्षा तैनाथी बढाएको हो ।
यस्ता घटनामा प्रतिबन्धित अवामी लिगका समर्थक संलग्न रहेको आरोप लगाइएको छ । पछिल्ला १० दिनमा कम्तीमा २८ जिल्लामा दर्जनौँ बम विस्फोट र सवारीसाधनमा आगजनीका घटना भएका छन् । ती घटनामा प्रहरी र सर्वसाधारण घाइते भएका त्यहाँका सञ्चारमाध्यमले जनाएका छन् ।

नोभेम्बर १८ मा विरोध प्रदर्शनका क्रममा अज्ञात व्यक्तिहरूले सत्तारूढ बंगलादेश नेसनलिस्ट पार्टी (बीएनपी)का एक नेताको हत्या गरेका त्यहाँको प्रहरीले जनाएको छ ।

सन् २०२४ अगस्टमा विद्यार्थी आन्दोलनपछि सत्ता छाडेर भारत पुगेकी हसिना त्यसयता निर्वासनमा छिन् । उनले यसै वर्ष जुलाईमा बंगलादेश फर्किने घोषणा गरेकी थिइन् ।
हालै नयाँ राहदानी र परिचयपत्रका निम्ति आवेदन दिए पनि बंगलादेश सरकारले उनको अनुरोध अस्वीकार गरेको छ । उनको सम्भावित स्वदेश फिर्तीलाई ध्यानमा राख्दै डिसेम्बरअघि सुरक्षा सतर्कता बढाइएको हो ।