काठमाडौं । अमेरिकी सेनाले इरानका विभिन्न सैन्य लक्ष्यहरूमा हवाई आक्रमण जारी राखेको छ । इरानमाथि अमेरिकाको यो लगातार चौथो दिनको आक्रमण हो ।

अमेरिकाले इरानी बन्दरगाहहरूको नौसैनिक नाकाबन्दी पनि सुरु गरेको छ । इरानमाथि दबाब बढाउन यो कदम चालिएको अमेरिकी सेन्ट्रल कमाण्डले जनाएको छ ।

यसैबीच, अमेरिकी राष्ट्रपति डोनाल्ड ट्रम्पले इरानमाथि आक्रमण जारी राख्ने बताएका छन् ।

फक्स न्युजसँगको अन्तर्वार्तामा ट्रम्पले भने, ‘हामी मंगलबार राति र त्यसपछिको दिन पनि आक्रमण गर्नेछौँ । अर्को साता इरानका विद्युत केन्द्र र पुलहरूलाई पनि निसानामा पारिनेछ । यदि कुनै सम्झौता भएन भने त्यहाँ केही पनि बाँकी रहनेछैन ।’

ट्रम्पले इरान वार्ताका लागि तयार नभएसम्म अमेरिकी आक्रमण जारी रहने बताए । उनले आवश्यकता परेमा स्थलगत सैन्य कारबाही पनि सुरु गर्न सकिने उल्लेख गरेका छन् ।