काठमाडौं । राष्ट्रपति रामचन्द्र पौडेल आज इन्द्रजात्राको मुख्य दिन बसन्तपुरमा आयोजना हुने विशेष कार्यक्रममा सहभागी हुँदैछन्।

राष्ट्रपति कार्यालयका अनुसार राष्ट्रपति पौडेल प्रथम महिला सबिता पौडेलसहित अपराह्न ३ बजे बसन्तपुर पुग्नेछन्।

त्यहाँ उनले इन्द्रजात्राका विभिन्न कार्यक्रम तथा जात्रा अवलोकन गर्ने कार्यक्रम छ।

राष्ट्रपति दम्पतीलाई काठमाडौँ महानगरपालिकाकी कार्यवाहक प्रमुख सुनिता डंगोलले स्वागत गर्नेछिन्।

राष्ट्रपति पौडेल जुद्ध सालिकबाट पैदल हनुमानढोका दरबार क्षेत्रस्थित गद्दी बैठकसम्म पुगेर जात्रा अवलोकन गर्ने कार्यक्रम रहेको राष्ट्रपति कार्यालयले जनाएको छ।

इन्द्रजात्राका अवसरमा राष्ट्रपति पौडेलले श्रीगणेश, श्रीभैरव र श्रीकुमारीको रथमा दक्षिणा चढाउने तथा रथयात्रा सञ्चालनका लागि अनुमति दिने परम्परा रहेको छ।

हरेक वर्ष भाद्र शुक्ल द्वादशीका दिन हनुमानढोका दरबार क्षेत्रमा इन्द्रध्वजोत्थान गरेसँगै इन्द्रजात्रा सुरु हुने गर्छ।

काठमाडौँ उपत्यकाको प्रमुख सांस्कृतिक तथा धार्मिक पर्वका रूपमा मनाइने इन्द्रजात्राको आज मुख्य दिन हो।