काठमाडौं । बिचौलिया इनम सापकोटासँग नाम जोडिएपछि बिदामा बसेका सर्वोच्च अदालतका न्यायाधीशहरु तिहार बिदा सकेर इजलासमा फर्किएका छन् । प्रधानन्यायाधीश डा. मनोज शर्मा र न्यायाधीश हरि फुयाल सर्वोच्च अदालतको फुलकोर्ट बैठकपछि इजलासमा बसेका थिएनन् ।
मंगलबार प्रधानन्यायाधीश शर्मा र फुयाल दुबै नवनियुक्त न्यायाधीशसँग इजलासमा बसेका छन् । न्यायाधीश फुयाल दुई साता लामो बिदापछि पुनः जिम्मेवारीमा फर्किएका हुन् ।

उनी कात्तिक १७ गतेदेखि बिदामा थिए । न्यायाधीश फुयालको नाम बिचौलिया भनिएका इनम सापकोटासँग जोडेर मिडियामा समाचार प्रकाशन भएपछि विभिन्न टीकाटिप्पणी गरिएको थियो । उनी बिदा सकाएर मंगलबार सर्वोच्चमा उपस्थित भएका हुन् ।

सर्वोच्चको पेसी सूचीमा मुद्दाको सुनुवाइका निम्ति न्यायाधीशद्वय फुयाल र गोकर्ण डाँगीको संयुक्त इजलास तय भएको छ । उक्त मुद्दामा सुनुवाइ चलिरहेको छ । सापकोटाको ह्वाट्सएप म्यासेज सार्वजनिक भएपछि प्रधानन्यायाधीश डा. शर्मा र न्यायाधीश फुयाल केही दिन इजलासमा सामेल थिएनन् ।
शर्मा अदालत उपस्थित भएर पनि इजलास नलिएर न्यायप्रशासनका अरु काममा संलग्न थिए भने फुयालले तिहार अघिसम्म बिदा लिएका थिए । तीन साताअघि इनम सापकोटाको ह्वाट्सएप म्यासेजबाट प्रधानन्यायाधीश डा. मनोज शर्मा र न्यायाधीश हरि फुयालको नाम जोडिएको विवरण सार्वजनिक भएको थियो ।
विवरण सार्वजनिक भएपछि न्यायाधीश फुयालले आफूले सापकोटालाई होटल हिमालयमा भेटेको स्विकारेका थिए भने प्रधानन्यायधीश शर्माले आफ्नो कुनै बिचौलियासँग उठबस नभएको भन्दै विज्ञप्ती निकालेका थिए ।