ताप्लेजुङ । ‘नो केबलकार समूह’ले गाडीमा तोडफोड गर्दै चालक, स्वास्थ्यकर्मी तथा मानवअधिकारकर्मी माथि कुटपिट गरेपछि यातायात व्यावसायीले आजबाट ताप्लेजुङमा अनिश्चितकालीन यातायात बन्दको घोषणा गरेका छन् ।

पाथीभरा क्षेत्रमा केबलकारको बटम स्टेसन बन्ने ठाउँमा प्रहरी र ‘नो केबलकार समूह’ बिच भएको झडपमा घाइते भएकाहरूको उद्धारमा खटिएको रेडक्रसकर्मी, उद्योग वाणिज्य संघ कर्मी र इन्सेक प्रतिनिधि चढेको गाडी आन्दोलनरत समूहले हिजो तोडफोड गर्दै चालकलाई कुटपिट गरेको थियो ।

कुटपिट र तोडफोडको विरोधमा मेची राजमार्ग, तमोर करिडोर र दोभान गुफा धरान चल्ने र जिल्ला भित्रका सम्पूर्ण सडकमा यातायात व्यवसायीले बन्दको घोषणा गरेका हुन् ।

ताप्लेजुङ पाथीभरा यातायात सेवा प्रालिले हिजो साँझ विज्ञप्ति निकाल्दै गाडीमा क्षति पुर्याउनेलाई कारबाही, चालकको उपचार, क्षति भएको गाडी मर्मत र अन्य सवारी चालकको सुरक्षाको प्रत्याभूति नभएसम्म सवारी नचलाउने जनाएको छ ।

आन्दोलनकारीको कुटपिटबाट घाइते भएका चालक चालक फुङलिङ नगरपालिका–९ का ३५ वर्षीय राजकुमार पौडेल र झडपमा घाइते भएका सुरक्षाकर्मीहरूलाई हिजो साँझ उपचारको लागि जिल्ला अस्पताल ताप्लेजुङ ल्याइएको छ ।

आन्दोलनकारीले अधिकारकर्मी सवार मे १ ज २५७९ को गाडी तोडफोड गरेका छन् । तोडफोडबाट गाडीको सबै सिसामा फुटेको छ ।