विराटनगर । यसपटक विराटनगरमा ऐतिहासिक रथयात्रा संस्कृति र परम्परा जगेर्ना गर्न सीमित धर्मावलम्बीले सामाजिक दुरी कायम गरेर भए पनि निकालेका छन् ।

अघिल्ला वर्ष जसरी रथयात्रा नगर्ने बताएको आयोजकले यसपटक राधाकृष्णको युगल जोडीलाई खटमा राखेर सीमित धर्मावलम्बी बिच सामाजिक दुरी कायम गर्दै नगर परिक्रममा गराएको हो ।

कोरोनाभाइरस कोभिड १९ संक्रमणसंगै यो वर्ष यस्तो अवस्था आएको राधाकृष्ण धर्मशालाका अध्यक्ष बाबुराजा ओझाले जानकारी दिए ।

महानगरपालिकाका मेयर भीम पराजुलीले परम्परा धान्नका लागि विषम परिस्थितीमा समेत सुरक्षित रुपमा कार्य गरिएको बताएका छन् ।

विराटनगरको ऐतिहासिक रथयात्रालाई निरन्तरता दिने उदेश्य अनुरुप खटयात्रा गरेकोमा आयोजक समितिलाई मेयर पराजुलीले धन्यवाद दिएका छन् ।

१९८८ सालमा खट यात्राबाट सुरु गरिएको राधाकृष्ण रथयात्राले २०२५ सालपछि बृहत रथयात्राको रुपमा निरन्तरता पाउदै आएको थियो ।

विराटनगरमा कृष्ण जन्माष्टमीको भोलीपल्ट निकालिने यस रथयात्रालाई दक्षिण एशियाकै अग्लो रथयात्रा दाबी गरिएको छ ।