धरान । धरानस्थित वीपी कोइराला स्वास्थ्य विज्ञान प्रतिष्ठानमा उपचाररत कोरोना संक्रमित दुइ पुरुषको मृत्यु भएको छ ।

प्रतिष्ठानका अनुसार मोरङ कानेपोखरी गाँउपालिकाका ५५ र सप्तरी राजविराजका ७० वर्षीय पुरुषको उपचारका क्रममा मृत्यु भएको हो ।

प्रतिष्ठानका प्रवक्ता डा निदेश सापकोटाका अनुसार सप्तरी राजविराज ३ का बृद्धको बिहीबार राती ११ बजे र कानेपोखरी गाँउपालिकाका ५५ वर्षीय पुरुषको राती साढे ८ बजे उपचारका क्रममा मृत्यु भएको हो ।

गजेन्द्रनारायण सिंह अस्पताल राजविराजबाट ज्वरो, खोकी, श्वासप्रश्वासमा कठिनाई र निमोनियासहित कोभिड १९ पोजिटिभ रिपोर्टसंगै भदौ २८ गते राती पौने १२ बजे प्रतिष्ठानको कोभिड १९ अस्पतालमा भर्ना गरिएको थियो ।

त्यसैगरि, कानेपोखरीका ५५ वर्षीय पुरुषलाई भने वीपीकै सर्जिकल वार्डबाट पिसिआर पोजिटिभ देखिएपछि कोभिड १९ अस्पतालमा बिहीबार साँझ भर्ना गरिएको थियो ।

उनको आन्द्रामा क्यान्सर भएर जटिल शल्यक्रिया गरिएको र शरीरको अन्य भागमा समेत क्यान्सर फैलिसकेको अवस्था रहेको प्रवक्ता सापकोटाले बताए ।

यससंगै प्रतिष्ठानमा हालसम्म ३३ जना कोरोना संक्रमितको मृत्यु भइसकेको छ ।

प्रदेश १ मा भने हालसम्म ६१ जना संक्रमितको उपचारका क्रममा मृत्यु भएको छ । जसमा १७ महिला र ४४ पुरुष रहेका छन् ।

प्रदेश १ बाहिरबाट २ महिला र ११ पुरुषको मृत्यु भएको सामाजिक विकास मन्त्रालय प्रदेश १ ले जनाएको छ ।