विराटनगर । नेपाल कम्यूनिस्ट पार्टी नेकपा प्रचण्ड–नेपाल समूहले शुक्रबार (आज) विराटनगरमा शक्ति प्रदर्शनसहित विरोधसभा गर्दैछ । संसद (प्रतिनिधिसभा) विघटनको विरोधमा आन्दोलनरत सो समूहले मध्यान्ह १२ बजेबाट प्रदर्शन सुरु गर्ने बताइएको छ ।

विराटनगरको बरगाछी, तीनपैनी, रोडशेष चोक र हाटखोलाबाट एकैसाथ सुरु हुने प्रदर्शन जनआन्दोलन चोकमा पुगेर विरोध सभामा परिणत हुने नेकपा दाहाल–नेपाल समूहका केन्द्रीय सदस्य महेश रेग्मीले जानकारी दिए ।

उनका अनुसार सभामा अध्यक्षहरु दाहाल र नेपाल, वरिष्ठ नेता झलनाथ खनाल, नेता योगेश भट्टराई लगायतले सम्बोधन गर्ने कार्यक्रम छ ।

प्रदर्शनमा ६० हजार हाराहारीमा कार्यकर्ता उतार्ने योजना रहेको सो समूहले जनाएको छ ।

कार्यक्रममा सहभागी हुन अध्यक्ष नेपाल र नेता खनाल बिहीबार नै विराटनगर आइपुगेका छन् । अर्का अध्यक्ष दाहाल शुक्रबार बिहान आउने कार्यक्रम तय भएको रेग्मीले बताए ।