काठमाडौं– प्रमुख प्रतिपक्ष दल नेपाली कांग्रेसका सांसद प्रतिमा गौतमले दृष्टिविहीनलगायत सम्पूर्ण अपांगता भएका व्यक्तिहरूलाई बैंकिङ सुविधा प्रयोग गर्न समस्या भएको भन्दै सरकारको ध्यानाकर्षण गराएकी छन् ।

मंगलबारको प्रतिनिधिसभा बैठकको शून्य समयमा बोल्दै उनले नेपालको कुल जनसंख्याको २.२४ प्रतिशत जनसंख्यामा अपांगता भएका व्यक्तिहरू रहेको बताइन् ।

उनले दृष्टिविहीन अपांगता भएका व्यक्तिहरूको समस्या धेरै र विकराल रहेको भन्दै पहुँच पुर्‍याउन माग गरेकी छन् ।

उनले भनिन् , ‘दृष्टिविहीन अपांगता भएका व्यक्तिले हाल सम्म सहजरूपले बैंकिङ लिन सकिरहेका छैनन् । सबैभन्दा पहिला कतिपय बैकले साक्षी बेगर खाता खोल्न नदिने । खाता खोले पछि पनि उनीहरू सक्षम हुँदाहुँदै पनि एटियम मोबाइल बैंकिङ जस्ता सेवाहरू उपयोग गर्न पाइरहेका छैनन्। दृष्टिविहीन व्यक्ति लगायत सम्पूर्ण अपांगता भयका व्यक्तिहरूलाई बैंकिङ क्षेत्रमा देखिएका समस्याहरू तत्कालै सम्बोधन गराउन सरकारको ध्यानाकर्षण गराउँछु ।’

प्रतिनिधिसभा बैठकको शून्य समयमा नेपाली कांग्रेसका सांसद प्रतिमा गौतम ।