काठमाडौं । लेबनानको बेरुतमा प्रदर्शनकारीको आक्रमणबाट नेपाली सेनाका उपरथी चोकबहादुर ढकाल घाइते हुनुभएको छ । गए राति करिब १२ बजे बेरुत नजिक यूएनआईएफआईएल मिसनका डेप्युटी फोर्स कमान्डर (शान्ति सैनिक) उपरथी ढकाल सवार कन्भोयलाई प्रदर्शनकारीहरूले रोकी तोडफोड गर्दा उहाँ घाइते हुनुभएको हो ।

घटनालगत्तै उहाँलाई उद्धार गरी यूएन लेभल थ्री अस्पताल पुर्‍याइएको थियो । अस्पताललाई उद्धृत गर्दै उहाँ खतरामुक्त भएको नेपाली सेनाले जानकारी दिएको छ । ढकाल आफ्नो कार्यकाल पूरा गरी स्वदेश फर्कने क्रममा हुनुहुन्थ्यो ।

संयुक्त राष्ट्रसंघले घटनाको अनुसन्धान गरी कारबाहीका लागि लेबनानी सरकारसँग माग समेत गरेको छ । लेबनानी प्रधानमन्त्री तथा लेबनिज आर्म्ड फोर्सले तत्काल अनुसन्धान गरी घटनामा संलग्नलाई कारबाहीको दायरामा ल्याउने बताएका छन् ।