ताप्लेजुङ । ताप्लेजुङ सदरमुकाम फुङलिङमा शनिबार साँझ प्रहरी र ‘नो केबलकार’ समुहबीचमा झडप भएको छ ।

पदयात्रा भन्दै पाथीभरा क्षेत्रमा पुगेको उक्त समूहले शनिबार सदरमुकाममा राँके जुलुससहित प्रदर्शन गरेपछि प्रहरीसँग झडप भएको हो ।

उक्त समूहले प्रहरीलाई लाठी र आगो नै प्रहार गरेका थिए । झडप सदरमुकामको विरेन्द्र चोकमा भएको हो ।

उक्त समूहमा जिल्लाका भन्दा धेरै जिल्ला बाहिर र राजेन्द्र महतोसँग गएका मधेश प्रदेशका व्यक्ति छन् । उनीहरू ताप्लेजुङ प्रवेश गरेदेखि नै अराजक क्रियाकलाप गरिरहेको ताप्लेजुङका सुरक्षा अधिकारी बताउँछन् ।

शान्तिपूर्ण पदयात्रा भन्दै पाथीभरा क्षेत्रमा पुगेको उक्त समूहले ढुंगा र लाठी प्रहार गरेपछि बिहीबार पनि काफ्लेपाटी क्षेत्रमा पनि झडप भएको थियो ।