विराटनगर । मोरङको धनपालथान गाउँपालिका–७ कदमा मुस्लिम टोलमा भएको आगलागीमा निधन भएकी एक बालिकाको परिचय खुलेको छ ।

उक्त घटनामा स्थानीय अनित मियाकी ४ वर्षीय छोरी रेश्मा खातुनको जलेर निधन भएको रहेको प्रहरीले जनाएको छ । आगलागीमा दुई बालबालिकाको निधन भएको थियो । एक बालकको परिचय खुलेको छैन ।

आगलागी विद्युत् सर्ट भइ भएको भन्ने सूचना पाउन साथ प्रहरी घटनास्थल पुगेको थियो । तर, अत्याधिक घाम, र हावाका कारण आगो नियन्त्रणमा समस्या हुँदा उक्त टोलका ८ घर जलेको जिल्ला प्रहरी कार्यालय मोरङका प्रवक्ता डीएसपी वेदप्रकाश जोशीले जानकारी दिए ।

आगो उद्यान १२ः३० बजेबाट सुरु भएको थियो । आगलागी नियन्त्रणमा लिन स्थानीय, प्रहरी, रंगेली नगरपालिका, कानेपोखरी गाउँपालिका, बेलबारी नगरपालिका, पथरी शनिश्चरे नगरपालिका र विराटनगर महानगरपालिकाका ५ वटा दमकल घटनास्थल पुगेका थिए ।

अहिले घटना स्थलमा मोरङका प्रमुख जिल्ला अधिकारीसहितको टोली पनि पुगेको छ भने केही समय अघि नेपाली सेनाको टोली पनि पुगेर आगो नियन्त्रणमा खटिएको छ ।