काठमाडौं । त्रिभुवन अन्तर्राष्ट्रिय विमानस्थलको दैनिक उडान तथा सञ्चालन समय अस्थायी रूपमा घटाइएको छ। विमानस्थल कार्यालयले नोटाम जारी गर्दै आज रातिदेखि लागू हुने गरी आगामी एक महिनासम्म नयाँ समय निर्धारण गरेको हो।

नयाँ व्यवस्थाअनुसार विमानस्थल अब राति ११:४५ बजे बन्द हुनेछ भने बिहान ६:३० बजे मात्र पुन: सञ्चालनमा आउनेछ। यसअघि विमानस्थल राति १ बजेसम्म खुला रहने व्यवस्था थियो।

विमानस्थल सुधार आयोजनाअन्तर्गत धावनमार्ग आसपासमा निर्माण तथा स्तरोन्नति कार्य हुने भएकाले उडान समय कटौती गरिएको कार्यालयले जनाएको छ। निर्माण कार्यलाई सुरक्षित र व्यवस्थित रूपमा अघि बढाउन तथा उडान सञ्चालनमा प्रभाव न्यून बनाउन समय तालिका परिवर्तन गरिएको बताइएको छ।