काठमाडौं । विराटनगर महानगरपालिकाले शहरी क्षेत्रको पैदलमार्गमा देखिएको अव्यवस्थित प्रयोगलाई नियन्त्रणमा ल्याउन कार्यान्वयनमुखी कदम अघि बढाएको छ।

बजार क्षेत्र केन्द्रित यस अभियानअन्तर्गत सार्वजनिक आवागमनका लागि छुट्याइएका स्थानलाई खाली गराउने कार्य शुक्रबारदेखि औपचारिक रूपमा सुरु गरिएको हो।

महानगरकी उपप्रमुख शिल्पा निरला कार्कीको समन्वयमा नगर प्रहरी र नेपाल प्रहरी को संयुक्त टोलीले स्थलमै पुगेर सडकपेटीमा राखिएका विभिन्न सामग्री हटाउने कार्य प्रारम्भ गरेको जनाएको छ।

यसअघि स्थानीय सरकारबाट निरन्तर दुई दिनसम्म ध्वनि-प्रसारणमार्फत व्यवसायी तथा सर्वसाधारणलाई नियम पालना गर्न पूर्वसूचना दिइएको थियो। चेतावनी अवधिपछि कार्यान्वयन चरणमा प्रवेश गरिएको महानगरको भनाइ छ।

महानगरपालिकाले व्यापारिक प्रतिष्ठानहरूलाई सटर बाहिर सामान प्रदर्शन नगर्न स्पष्ट निर्देशन दिएको छ।

त्यस्तै, पैदलमार्गमा निर्माण सामग्री थुपार्ने, मोटरसाइकल मर्मतसम्बन्धी उपकरण राख्ने तथा प्रचलित मापदण्ड विपरीत कवाडी कारोबार सञ्चालन गर्ने कार्यलाई निषेध गरिएको उल्लेख गरिएको छ।

सार्वजनिक स्थलको सुव्यवस्थित उपयोग, पैदल यात्रीको सहजता र शहरी अनुशासन कायम गर्ने उद्देश्यले यस्तो कदम चालिएको महानगरपालिकाले जनाएको छ।