काठमाडौं । दक्षिण-पश्चिम फ्रान्समा फैलिएको भीषण डढेलोका कारण विस्थापित हुनेको संख्या दुई लाख ५० हजार नाघेको छ। पछिल्लो चरणमा मात्रै करिब ५५ हजार मानिसलाई सुरक्षित स्थानमा स्थानान्तरण गरिएको स्थानीय प्रशासनले जनाएको छ।

अधिकारीहरूका अनुसार आगो वाइन उत्पादनका लागि परिचित बोर्दो सहरतर्फ फैलिने क्रममा रहेको छ। गिरोन्ड क्षेत्रीय प्रशासनले बोर्दोको दक्षिण-पश्चिममा रहेका थप पाँच बस्तीका बासिन्दालाई रातारात सुरक्षित स्थानमा जान निर्देशन दिएको छ।

रातभर चलेको तीव्र हावाले आगो नियन्त्रणमा चुनौती थपिएको प्रशासनको भनाइ छ। साताको मध्यदेखि नियन्त्रणबाहिर रहेको डढेलोका कारण आइतबार बिहानसम्म करिब ४२ हजार हेक्टर वन तथा अन्य क्षेत्र प्रभावित भएको अनुमान गरिएको छ।

यस वर्षको निरन्तर तातो हावाको लहरका कारण पाइनका जंगल र झाडी क्षेत्र अत्यधिक सुक्खा बनेपछि डढेलो फैलिने जोखिम बढेको अधिकारीहरूले बताएका छन्।

आगो नियन्त्रणका लागि दमकल टोलीले जमिन र आकाश दुवैबाट प्रयास जारी राखेको छ। अग्निनियन्त्रण विमानमार्फत पानी र आगो नियन्त्रण गर्ने रसायन छर्किने कार्य भइरहेको छ भने चौबीसै घण्टा खटिएका दमकलकर्मीलाई सहयोग गर्न सेनासमेत परिचालन गरिएको छ।

बोर्दोका मेयर थोमस काजेनाभले डढेलो महानगरीय क्षेत्रको नजिकसम्म आइपुगेको जानकारी दिएका छन्। उनका अनुसार आगो सहरबाट करिब १५ किलोमिटर दूरीसम्म फैलिसकेको छ।

सुरक्षालाई ध्यानमा राख्दै गिरोन्ड प्रशासनले बोर्दो प्रवेश र बाहिरिने मुख्य राजमार्गका केही खण्डमा आवागमनसमेत बन्द गरेको छ।

यसैबीच, छिमेकी स्पेनको पूर्वी तटीय भ्यालेन्सिया क्षेत्रमा पनि डढेलोका कारण स्थानीय बासिन्दालाई सुरक्षित स्थानमा सारिएको छ। भ्यालेन्सिया र मड्रिडको पश्चिमी क्षेत्रमा यस साता फैलिएको आगलागीका कारण करिब एक लाख १६ हजार मानिस विस्थापित भएका छन्।

फ्रान्सको दक्षिणी ल्यान्डेस क्षेत्रमा लागेको अर्को डढेलोबाट पनि यस साता करिब ३० हजार मानिस प्रभावित भएका छन्। यी घटनासँगै दक्षिण-पश्चिम फ्रान्समा डढेलोका कारण घर छाड्न बाध्य हुनेको कुल संख्या दुई लाख ५० हजारभन्दा माथि पुगेको छ।