काठमाडौँ । विज्ञान, प्रविधि तथा नवप्रवर्तन मन्त्रालयले स्वीकृत संगठन संरचना तथा दरबन्दी तेरिज राष्ट्रिय किताबखानामा दर्ता गराएको छ। नयाँ संगठन संरचना दर्ता गराउने यो दोस्रो मन्त्रालय बनेको छ।

मन्त्रालयले आइतबार आफ्नो संगठन संरचना तथा दरबन्दी तेरिज स्वीकृत गरी औपचारिक दर्ताका लागि राष्ट्रिय किताबखानामा पठाएको थियो। प्राप्त विवरण सोही दिन द्रुत प्रक्रियाबाट दर्ता गरिएको किताबखानाका महानिर्देशक श्रवणकुमार पोखरेलले जानकारी दिए।

संगठन संरचना तथा दरबन्दीसम्बन्धी विवरण शीघ्र दर्ता गर्न तालिमप्राप्त कर्मचारी सम्मिलित विशेष कार्यदल परिचालन गरिएको महानिर्देशक पोखरेलले बताए। उनका अनुसार कार्यदलले प्राप्त विवरण परीक्षण गरी दर्ता प्रक्रिया पूरा गरेको हो।

मन्त्री महावीर पुनले नेतृत्व गरेको मन्त्रालयको स्वीकृत संगठन संरचनामा विशिष्ट श्रेणीका एक सचिवको दरबन्दी कायम गरिएको छ। मन्त्रालयमा इन्जिनियरिङ सेवाका दुई र प्रशासन सेवाका एक गरी तीन सहसचिवसहित कुल ९० दरबन्दी रहनेछन्।

यसअघि भूमि व्यवस्था, सहकारी, संघीय मामिला तथा सामान्य प्रशासन मन्त्रालय नयाँ संगठन संरचना तथा दरबन्दी तेरिज राष्ट्रिय किताबखानामा दर्ता गराउने पहिलो मन्त्रालय बनेको थियो।