उत्तराखण्ड । भारतको उत्तरी पहाडी राज्य उत्तराखण्डमा निर्माणाधीन सुरुङ भत्किँदा कम्तीमा सात जना कामदारको मृत्यु भएको छ। स्थानीय अधिकारीहरूले घटनाको पुष्टि गरेका छन्।

उत्तराखण्डको चमोली जिल्लास्थित पीपलकोटी क्षेत्रमा बिहीबार अबेर राति दुर्घटना भएको हो। सुरुङभित्र करिब २५ जना कामदार कार्यरत रहेका बेला अचानक पानीको बहावसँगै आएको लेदो र भग्नावशेषले उनीहरूलाई थुनेको थियो।

दुर्घटनालगत्तै सुरु गरिएको उद्धार अभियानका क्रममा १६ जना कामदारलाई जीवितै बाहिर निकालिएको स्थानीय प्रशासनले जनाएको छ। उद्धारका क्रममा सात जनाको शव फेला परेको छ भने सुरुङभित्र फसेका अन्य कामदारको खोजी तथा उद्धार कार्य जारी रहेको बताइएको छ।

उक्त सुरुङ भारत सरकारको स्वामित्वमा रहेको टीएचडीसी इन्डिया लिमिटेडले निर्माण गरिरहेको थियो।