काठमाडौँ । दक्षिण कोरियाली राष्ट्रपति ली जे म्युङले आफ्नो कार्यकालभित्रै संयुक्त राज्य अमेरिकाबाट युद्धकालीन सैन्य परिचालन नियन्त्रण (ओपिसीओएन) फिर्ता लिने सरकारी योजनालाई पुनः पुष्टि गरेका छन्। मन्त्रिपरिषद् बैठकलाई सम्बोधन गर्दै उनले सन् २०३० मा आफ्नो कार्यकाल समाप्त हुनुअघि नै दक्षिण कोरियाली सेनाको युद्धकालीन कमान्ड पुनः प्राप्त गर्ने लक्ष्य दोहोर्‍याएका हुन्।

राष्ट्रपतिको कार्यालय ‘ब्लु हाउस’मा आयोजित बैठकमा राष्ट्रपति लीले दक्षिण कोरियासँग आत्मनिर्भर राष्ट्रिय रक्षाका लागि आवश्यक आधार र परिस्थिति पर्याप्त रहेको बताए। राष्ट्रिय सुरक्षालाई थप सुदृढ बनाउन सैन्य परिचालन क्षमता व्यापक रूपमा सुधार र स्तरोन्नति गर्नुपर्नेमा उनले जोड दिए।

दक्षिण कोरिया र अमेरिकाबीच सोमबारदेखि सुरु भएको ‘उल्ची फ्रिडम सिल्ड’ नामक संयुक्त सैन्य अभ्यासको पृष्ठभूमिमा राष्ट्रपतिको यस्तो भनाइ आएको हो।

ऐतिहासिक रूपमा, सन् १९५० को दशकमा दक्षिण कोरियाले आफ्नो सैन्य कमान्ड अमेरिकी नेतृत्वको ‘संयुक्त राष्ट्र संघ कमान्ड’लाई हस्तान्तरण गरेको थियो। सन् १९७८ मा उक्त जिम्मेवारी अमेरिकी सैन्य अधिकारीको नेतृत्वमा रहने ‘दक्षिण कोरिया–अमेरिका संयुक्त सेना कमान्ड’मा सारिएको थियो।

दक्षिण कोरियाले सन् १९९४ मा शान्तिकालीन सैन्य परिचालन नियन्त्रण फिर्ता पाए पनि युद्धकालीन कमान्ड भने अझै अमेरिकाकै हातमा छ। राष्ट्रपति लीले यही युद्धकालीन कमान्ड फिर्ता लिने प्रक्रियालाई आफ्नो कार्यकालभित्रै पूर्णता दिने प्रतिबद्धता व्यक्त गरेका हुन्।