विराटनगर । नेपाली कांग्रेसको १५ औँ महाधिवेशनअन्तर्गत मोरङ क्षेत्र नम्बर ६ मा भएको झडपमा नेता शेखर कोइरालाको कुनै संलग्नता नरहेको सचिवालयले जनाएको छ ।

अधिवेशन स्थलमा भएको घटनासँग नेता कोइरालाको दुष्प्रचार भएको सचिवालयको जिकिर छ । नेता कोइराला एकता महाधिवेशनको पक्षमा रहेकाले दुवै पक्षको महाधिवेशनमा सहभागी नरहेको स्वकीय सचिव दिनेशचन्द्र थपलियाले बताएका छन् ।

”डा. शेखर कोइराला पार्टीको ‘एकता महाधिवेशन’का पक्षमा रहनुभएको र दुवै महाधिवेशन प्रक्रियाबाट तटस्थ रहनुभएकाले उक्त घटनामा उहाँको कुनै पनि किसिमको संलग्नता नरहेको जानकारी गराउँदछु,” विज्ञप्तिमा भनिएको छ ।

कांग्रेसको १५औँ महाधिवेशनअन्तर्गत मोरङ निर्वाचन क्षेत्र नम्बर ६ को अधिवेशन स्थलमा झडप भएको थियो । सुन्दरहरैँचा नगरपालिका–४ स्थित सिग्देल बन्धु सामुदायिक भवनमा अधिवेशन आयोजना गरिएको थियो ।

बाँसबारीमा मनोनयन दर्ताको तयारी भइरहेका बेला प्रतिनिधिको नामावलीलाई लिएर विवाद भएपछि दुई समूहबीच झडप भएको थियो । घटनामा केही नेता–कार्यकर्ता घाइते समेत भएका थिए ।