काठमाडौं । नेपाली कांग्रेसको संस्थापन इतर समूहले पार्टीको महाधिवेशन काठमाडौंको खुलामञ्चमा गर्ने भएको छ। केन्द्रीय निर्वाचन समितिका सदस्यसचिव अमृत कार्कीले महाधिवेशनका लागि काठमाडौंका तीन स्थान तय गरिएको जानकारी दिएका छन्।

उनका अनुसार महाधिवेशन खुलामञ्चमा आयोजना हुनेछ भने भृकुटीमण्डपको बगैँचा क्षेत्रमा सहभागी प्रतिनिधिका लागि खानाको व्यवस्था गरिनेछ। त्यस्तै, मतदानका लागि राष्ट्रियसभा गृह प्रयोग गरिने भएको छ।

आगामी मंसिर २१ देखि २३ गतेसम्म आयोजना हुने तय भएको महाधिवेशनमा सात हजारभन्दा बढी प्रतिनिधि सहभागी हुने संस्थापन इतर समूहको दाबी छ। महाधिवेशनस्थलको टुंगो लगाए पनि संस्थापन इतर समूहले भावी नेतृत्वबारे भने निर्णय गर्न सकेको छैन। सभापतिका आकांक्षीहरूबीच सहमति जुट्न नसक्दा सभापतिको उम्मेदवार कसलाई बनाउने भन्ने विषय अझै अनिर्णीत रहेको छ।