काठमाडौं । नवनियुक्त प्रहरी महानिरीक्षक डा. मनोजकुमार केसीलाई गृहमन्त्री सुधन गुरुङले दर्ज्यानी चिह्न प्रदान गरेका छन् । बुधबार गृह मन्त्रालयमा आयोजित कार्यक्रममा गृहमन्त्री गुरुङले केसीलाई दर्ज्यानी चिह्न लगाइदिएका हुन् ।

यसअघि गृहसचिवले आईजीपीलाई दर्ज्यानी चिह्न प्रदान गर्ने परम्परा थियो । सरकारले दानबहादुर कार्कीलाई हटाएर केसीलाई आईजीपी नियुक्त गरेको हो । कार्कीलाई प्रधानमन्त्रीको विशेष सुरक्षा सल्लाहकार बनाइएको छ ।

प्रहरी इतिहासमा यसअघि तत्कालीन गृहमन्त्री वामदेव गौतमले ध्रुवबहादुर प्रधानलाई पहिलोपटक दर्ज्यानी चिह्न लगाइदिएका थिए । त्यसपछि गृहसचिवले लगाइदिने परम्परा चलेको थियो । अहिले पुनः गृहमन्त्रीले नै दर्ज्यानी चिह्न प्रदान गरेका छन् ।