काठमाडौं । नेपाली तेक्वान्दो खेलाडी वैभवी सापकोटाले थाइल्यान्डमा सम्पन्न बैंकक खुला अन्तर्राष्ट्रिय तेक्वान्दो प्रतियोगितामा नेपाललाई दुई पदक दिलाएकी छन् । नेपालबाट एकमात्र सहभागी खेलाडी वैभवीले क्योरुगी विधामा रजत र पुम्से विधामा कांस्य पदक जितेकी हुन् । बैंककस्थित फेसन आइल्याण्डको स्पोर्ट्स हलमा आयोजित प्रतियोगितामा ११ वर्षीया वैभवी क्योरुगी विधाको फाइनलमा थाइल्यान्डकी खेलाडीसँग प्रतिस्पर्धात्मक खेलमा पराजित हुँदै रजत पदकमा सीमित भइन् ।

त्यसैगरी, पुम्से विधामा ३५ खेलाडीबीच भएको प्रतिस्पर्धामा उनले कांस्य पदक हासिल गरिन् । यसअघि वैभवीले थाइल्यान्डमै सम्पन्न १४औँ रोयल प्रिन्सेस कप अन्तर्राष्ट्रिय तेक्वान्दो प्रतियोगितामा दुई रजत पदक जितेकी थिइन् ।

शनिबार र आइतबार गरी दुई दिन सञ्चालन भएको प्रतियोगितामा नेपालसहित थाइल्यान्ड, भारत, इन्डोनेसिया, अमेरिका, हङकङ, म्यान्मा, बेल्जियम, सिंगापुर र भियतनामका करिब तीन हजार खेलाडी सहभागी थिए ।