काठमाडौं । नेपाल–भारत खुला सीमाको फाइदा उठाउँदै अवैध रूपमा गाँजा ओसारपसार भइरहेको सूचनाका आधारमा प्रहरीले ठूलो परिमाणमा लागू औषधसहित दुई जनालाई नियन्त्रणमा लिएको छ।

जिल्ला प्रहरी कार्यालय सुनसरीका अनुसार सोमबार राति करिब ९:३० बजे अस्थायी प्रहरी पोष्ट सखुवागाछीबाट खटिएको टोलीले इनरुवा नगरपालिका-६ भोटेपुलस्थित पूर्व-पश्चिम राजमार्गमा सवारी साधन जाँच गरिरहेको थियो। सो क्रममा पूर्वबाट पश्चिमतर्फ गइरहेको को २ ह ६१२५ नम्बरको अटो रोक्न खोज्दा चालकले अटेरी गर्दै भाग्न खोजेपछि अस्थायी प्रहरी पोष्ट बसपार्क इनरुवाको सहयोगमा इनरुवा-४ क्षेत्रमा उक्त सवारी साधन नियन्त्रणमा लिइएको हो।

अटोको खानतलासी गर्दा करिब ९९ दशमलव १ केजी गाँजा बरामद भएको प्रहरीले जनाएको छ। सो घटनामा अटो चालक धनकुटा जिल्लाको चौबिसे गाउँपालिका-७ का २५ वर्षीय साजन लिम्बु र अटोमा सवार १९ वर्षीय गगन लिम्बुलाई लागू औषध र सवारी साधनसहित नियन्त्रणमा लिइएको छ।

पक्राउ परेकाहरूलाई थप अनुसन्धानका लागि जिल्ला प्रहरी कार्यालय सुनसरीमा ल्याई आवश्यक कानुनी प्रक्रिया अगाडि बढाइएको प्रहरीले जानकारी दिएको छ।