कमठमाडौं । कोशी प्रदेश सरकारले सार्वजनिक सेवा प्रवाहलाई आधुनिक, छरितो र प्रविधिमैत्री बनाउने लक्ष्यसहित इटहरीस्थित यातायात व्यवस्था कार्यालयमा डिजिटल सेवा प्रणाली कार्यान्वयनमा ल्याएको छ।

सोमबार आयोजित औपचारिक कार्यक्रममा कोशी प्रदेशका आन्तरिक मामिला तथा कानून मन्त्री इन्द्रमणि पराजुलीले अनलाइन भुक्तानी तथा टोकन प्रणालीको शुभारम्भ गरे। यससँगै यातायात सेवा प्रक्रियामा डिजिटल माध्यमको प्रयोग सुरु भएको हो।

नयाँ व्यवस्था लागू भएपछि सेवाग्राहीले सवारीसाधनसँग सम्बन्धित राजस्व तथा अन्य शुल्कहरू अनलाइन माध्यमबाटै भुक्तानी गर्न सक्ने सुविधा पाउने भएका छन्। कार्यालयमा प्रत्यक्ष उपस्थित भई लामो समय लाइन बस्नुपर्ने पुरानो अभ्यासलाई क्रमश: विस्थापित गर्ने उद्देश्य यस प्रणालीले लिएको छ।

कार्यक्रममा मन्त्री पराजुलीले सरकारी सेवा प्रवाहलाई सहज बनाउन प्रविधिको प्रयोग अनिवार्य भएको उल्लेख गर्दै परम्परागत प्रक्रियाका कारण देखिने ढिलासुस्ती र झन्झट न्यूनीकरणतर्फ सरकार अग्रसर रहेको बताए।