काठमाडौं । सर्वोच्च अदालतको आदेशसँगै काठमाडौंका विभिन्न ठाउँका खोला किनारका बस्ती हटाउने कार्य रोकिएको छ । सर्वोच्चले काठमाडौंका नदी किनार र सार्वजनिक स्थानमा बनाइएका बस्ती खाली नगर्न शुक्रबार सरकारलाई अन्तरिम आदेश दिएको थियो ।

शनिबार काठमाडौं महानगरपालिकाको वडा नम्बर ३ र २६ मा पर्ने खाडीपाखा, सामाखुसीका खोला किनारका बस्ती हटाइने तयारी थियो । त्यस क्षेत्रका खोला किनारका बस्ती दुई दिनभित्र खाली गरिदिन माइकिङ समेत भएको थियो । तर, अदालतको आदेशपछि बस्ती हटाउने कार्य हाललाई स्थगित भएको महानगर प्रहरीप्रमुख एसपी विष्णु जोशीले जानकारी दिए ।

“काठमाडौं महानगरपालिका वडा नम्बर ३ र २६ मा पर्ने खाडीपाखा, सामाखुसीका खोला किनारका बस्ती हटाउने भनिएको भोलि बिहान ७ बजेको कार्यक्रम सम्मानित अदालतको आदेशबमोजिम स्थगित गरिएको व्यहोरा अनुरोध छ,” महानगर प्रहरीले भनेको छ ।