काठमाडौं । पूर्वी क्षेत्रको प्रमुख भन्सार नाका मेची भन्सार कार्यालय, काँकरभिट्टाले आर्थिक वर्ष २०८२-८३ मा रु. १७ अर्ब ६७ करोड ७२ लाख ११ हजार राजस्व संकलन गरेको जनाएको छ।

कार्यालयका अनुसार उक्त रकम अघिल्लो आर्थिक वर्ष २०८१-८२ को तुलनामा रु. १ अर्ब ७४ करोड ६० लाख ४५ हजार ले बढी हो। यससँगै वार्षिक राजस्व संकलनमा करिब ११ प्रतिशतको वृद्धि भएको देखिएको छ।

यद्यपि, गत आर्थिक वर्षका लागि निर्धारण गरिएको राजस्व लक्ष्य भने पूरा हुन सकेन। कार्यालयलाई रु. १८ अर्ब ८७ करोड ७४ लाख ८३ हजार संकलन गर्ने जिम्मेवारी दिइएकोमा वास्तविक असुली लक्ष्यको करिब ९३ प्रतिशत मा सीमित भएको कार्यालयले जनाएको छ।

अघिल्लो आर्थिक वर्ष २०८१-८२ मा मेची भन्सारले रु. १५ अर्ब ९३ करोड ११ लाख ६६ हजार राजस्व संकलन गरेको थियो। त्यसको तुलनामा पछिल्लो वर्ष राजस्व असुलीमा उल्लेख्य सुधार देखिएको हो।

मेची भन्सार पूर्वी नेपालको महत्वपूर्ण आयात-निर्यात नाकामध्ये एक मानिन्छ। यस नाका हुँदै नेपालबाट चिया, अलैँची, अदुवा, अम्रिसोको कुचो तथा छुर्पीजस्ता कृषिजन्य उत्पादन विदेश निर्यात हुने गरेका छन्। यस्तै, पेट्रोलियम पदार्थ, कपडा, रासायनिक वस्तु तथा विभिन्न औद्योगिक प्रयोजनका सामग्री यही नाका भएर मुलुक भित्रिने गरेका छन्।