विराटनगर । मोरङको रतुवामाई नगरपालिका–४ भद्रचोकमा बिहीबार राति मोटरसाइकल दुर्घटनामा हुँदा चालकको मृत्यु भएको छ ।

विराटनगरबाट झापाको गौरीगन्जतर्फ जाँदै गरेको बा ७३ प ४२१६ नम्बरको मोटरसाइकल आफैं अनियन्त्रित भएर राति १०ः३५ बजेतिर दुर्घटना हुँदा मोटरसाइकल चालक गौरीगन्ज गाउँपालिका–६ आठमोजाका २८ वर्षीय वरुणकुमार राजवंशीको मृत्युु भएको हो ।

मृतकले मादक पदार्थ सेवन गरेर चलाएका कारण मोटरसाइकल दुर्घटनामा परेको हुनसक्ने प्रहरीको अनुमान छ ।

दुर्घटनामा गम्भीर घाइते भएका राजवंशीलाई उपचारका लागि रतुवामाई नगर अस्पताल झुर्किया पुर्याउनसाथ चिकित्सकले मृत घोषणा गरेका थिए । उनको शवलाई पोस्टमार्टमका लागि रंगेली अस्पताल लगिएको छ ।