काठमाडौं । सेवाग्राहीसँग घुस रकम लिएको आरोपमा काठमाडौँ महानगरपालिका वडा नं. ३० का लेखा अधिकृत (छैटौँ) उद्धव भट्टराई पक्राउ परेका छन् ।

स्थायी लेखा नम्बर (प्यान) बन्द गर्नका लागि आवश्यक पर्ने वडा कार्यालयको सिफारिस उपलब्ध गराउने क्रममा सेवाग्राहीसँग रकम माग गरेको भन्ने उजुरीका आधारमा अख्तियार दुरुपयोग अनुसन्धान आयोगले उनलाई नियन्त्रणमा लिएको हो ।

अख्तियारको टंगालस्थित कार्यालयबाट खटिएको टोलीले भट्टराईलाई सेवाग्राहीबाट २१ हजार रुपैयाँ घुस/रिसवत लिइसकेको अवस्थामा वडा कार्यालय परिसरबाट पक्राउ गरेको जनाएको छ ।

आयोगका अनुसार सेवाग्राहीलाई कामका लागि अनावश्यक झन्झट दिई रकम माग गरेको भन्ने सूचनापछि निगरानी बढाइएको थियो । सोही क्रममा घुस रकमसहित नियन्त्रणमा लिइएको हो ।

पक्राउ परेका लेखा अधिकृत भट्टराईमाथि थप अनुसन्धान भइरहेको अख्तियारले जनाएको छ ।