काठमाडौं । नेपाल नागरिक उड्डयन प्राधिकरणले बाढी तथा प्राकृतिक विपद्को विषम परिस्थितिमा हवाई भाडा वृद्धि नगर्न वायुसेवा कम्पनीहरूलाई निर्देशन दिएको छ।

प्राधिकरणको हवाई यातायात विभागले बुधबार विभिन्न सात वायुसेवा कम्पनीलाई पत्र पठाउँदै यात्रुको आवागमनमा सहजीकरण र राहत कार्यलाई प्रभावकारी बनाउन हाल कायम भाडादर नबढाउन भनेको हो।

प्राधिकरणले नेपाल वायुसेवा निगम, बुद्ध एयर, यती एयरलाइन्स, श्री एयरलाइन्स, समिट एयर, तारा एयर र सीता एयरलाई यस्तो निर्देशन दिएको छ।

नेपाल सरकारबाट स्वीकृत अधिकतम हवाई भाडादरभन्दा कम दरमा टिकट उपलब्ध गराउन तथा विद्यमान परिस्थितिलाई ध्यानमा राखेर हालको भाडादर वृद्धि नगर्न प्राधिकरणले आग्रह गरेको छ।

देशमा उत्पन्न बाढी तथा प्राकृतिक विपद्का कारण सर्वसाधारणको आवागमन प्रभावित भएका बेला यात्रुको चापलाई आधार बनाएर भाडा नबढाउन प्राधिकरणले वायुसेवा कम्पनीहरूको ध्यानाकर्षण गराएको हो।

प्राधिकरणको हवाई यातायात विभागका उपप्रबन्धक सन्तोष अधिकारीले वायुसेवा कम्पनीहरूलाई पत्राचार गर्दै निर्देशनअनुसार हवाई टिकट उपलब्ध गराउने व्यवस्था मिलाउन आग्रह गरेका छन्।