काठमाडौं । चितवन राष्ट्रिय निकुञ्जको जंगलमा भेटिने चर्चित जंगली भाले हात्ती रोनाल्डो करेन्ट लागेर मरेको पुष्टि भएको छ ।

शनिबार बिहान बिसहजारी ताल नजिकै रहेको कुमाल तालको छेउमा हात्ती मृत भेटिएको थियो ।

निकुञ्ज सुरक्षार्थ खटिएको नेपाली सेनाको ब्यारेकमा लगेको विद्युत्को तारबाट करेन्ट लाग्दा रोनाल्डोको घटनास्थलमा नै मृत्यु भएको हो ।

सेनाले बिसहजारी तालको गेटतिरबाट विद्युत् लगेको थियो ।

स्रोतका अनुसार, झण्डै १५१६ फिट अग्लो ठाँउमा रहेको तारसँगै रहेको घाँसलाई खानका लागि रोनाल्डोले तान्दा घाँससँगै तारसमेत झरेको थियो ।

बाहिर इन्सुलेसन गरेको तार रोनाल्डोले चपाउँदा त्यसमा प्रवाह भएको करेन्ट उसको मुख तथा जिब्रोमा लागेको थियो ।

५३ वर्षीय रोनाल्डो सौराहाको हात्ती प्रजनन् केन्द्रमा रहेका पोथी हात्तीसँग प्रजनन् गर्ने एक नम्बरको हात्ती रहेको थियो ।

रोनाल्डो हात्ती २४ वर्ष अगाडि निकुञ्जमा देखिएको थियो । रोनाल्डो ३८ वटा छावाको बाबू भएको निकुञ्जले जनाएको छ ।