विराटनगर । कोशी प्रदेश प्रहरी कार्यालय र मातहतका कार्यालय प्रमुखबीच आर्थिक वर्ष २०८३-८४ का लागि वार्षिक कार्यसम्पादन सम्झौता भएको छ।

कोशी प्रदेश प्रहरी प्रमुख प्रहरी नायव महानिरीक्षक (डीआईजी) शेखर खनाल तथा प्रदेशअन्तर्गतका १४ वटै जिल्ला प्रहरी प्रमुख र अन्य मातहत कार्यालयका प्रमुखबीच वार्षिक कार्यसम्पादन सम्झौतामा हस्ताक्षर भएको हो।

कार्यसम्पादन सम्झौताले चालु आर्थिक वर्षमा प्रदेश प्रहरी कार्यालय तथा मातहतका प्रहरी कार्यालयले सम्पादन गर्नुपर्ने काम, लक्ष्य र जिम्मेवारीलाई व्यवस्थित गर्ने अपेक्षा गरिएको छ।

यसैबीच, आर्थिक वर्ष २०८२-८३ मा नेपाल प्रहरी संगठन प्रमुख र कोशी प्रदेश प्रहरी प्रमुखबीच भएको वार्षिक कार्यसम्पादन सम्झौतामा कोशी प्रदेश प्रहरी कार्यालय विराटनगरले ८६।३६ प्रतिशत लक्ष्य हासिल गरेको जनाइएको छ।

प्राप्त विवरणअनुसार उक्त कार्यसम्पादन मूल्यांकनका आधारमा कोशी प्रदेश प्रहरी कार्यालय प्रदेशस्तरीय मूल्यांकनमा सर्वोत्कृष्ट प्रदेश प्रहरी कार्यालय बनेको छ।

त्यस्तै, कोशी प्रदेश प्रहरी प्रमुख र प्रदेशअन्तर्गतका १४ वटै जिल्ला प्रहरी प्रमुखबीच भएको आर्थिक वर्ष २०८२-८३ को वार्षिक कार्यसम्पादन सम्झौताको मूल्यांकनमा जिल्ला प्रहरी कार्यालय संखुवासभाले ९४.३८ प्रतिशत लक्ष्य हासिल गरेको छ।

९४.३८ प्रतिशत लक्ष्य हासिल गर्दै संखुवासभा जिल्ला प्रहरी कार्यालय प्रदेशअन्तर्गतका जिल्ला प्रहरी कार्यालयमध्ये सर्वोत्कृष्ट बनेको कोशी प्रदेश प्रहरी कार्यालयले जनाएको छ।

चालु आर्थिक वर्षका लागि भएको नयाँ कार्यसम्पादन सम्झौतामार्फत प्रदेश तथा जिल्ला तहका प्रहरी कार्यालयको कार्यसम्पादनलाई लक्ष्यमा आधारित बनाउँदै जिम्मेवारीअनुसारको प्रगति मूल्यांकन गर्ने आधार तय गरिएको छ।