काठमाडौं । स्थानीय तहको निर्वाचनको मिति तय गर्ने विषयमा छलफल गर्न निर्वाचन आयोगले राजनीतिक दलहरूलाई बोलाएको छ । आयोगले राष्ट्रिय दलको मान्यता प्राप्त गरेका राजनीतिक दलहरूलाई आगामी मंसिर ४ गते छलफलका लागि आमन्त्रण गरेको निर्वाचन आयुक्त गुरुप्रसाद वाग्लेले जानकारी दिएका छन् ।

प्रतिनिधिसभामा राष्ट्रिय दलको मान्यता प्राप्त गर्ने दलहरूमा राष्ट्रिय स्वतन्त्र पार्टी (रास्वपा), नेपाली कांग्रेस, नेकपा एमाले, नेकपा, श्रम संस्कृति पार्टी र राष्ट्रिय प्रजातन्त्र पार्टी (राप्रपा)  रहेका छन् । त्यस्तै, प्रतिनिधिसभामा राष्ट्रिय दलको मान्यता प्राप्त नगरे पनि जनता समाजवादी पार्टी (जसपा)  नेपाल र राष्ट्रिय जनमोर्चा पनि राष्ट्रिय दलका रूपमा रहेका छन् ।

स्थानीय तहका जनप्रतिनिधिको पाँचवर्षे कार्यकाल आगामी वैशाखमा सकिँदैछ । कार्यकाल सकिन लागेसँगै स्थानीय तहको आगामी निर्वाचनको तयारी र मिति निर्धारणबारे आयोगले राजनीतिक दलहरूसँग छलफल गर्न लागेको हो ।