काठमाडौं । अन्ततः नायिका पूजा शर्मा र पत्रकार प्रकाश सुवेदीबीच मिलापत्र भएको छ । एपीवान टेलिभिजनका मालिक क्याप्टेन रामेश्वर थापाको पहलमा दुवैबीचको झगडा मिलापत्रमा टुंगिएको हो ।

नेपाल कलाकार संघका अध्यक्ष रवीन्द्र खड्कालगायतले नायिका र पत्रकारबीचको विवाद मिलाउन निकै प्रयास गरेका थिए । सोही प्रयासले बिहीबार सार्थकता पाएको हो ।

सुवेदी र शर्माबीचको मिलापत्रमा कलाकार संघका अध्यक्ष रवीन्द्र खड्का, निर्माता संघका अध्यक्ष आकाश अधिकारी, नृत्यकार संघका का.वा.अध्यक्ष जनक कार्कीलगायतले हस्ताक्षर गरेका छन् ।

अबदेखि एकले अर्कालाई गालीगलौज नगर्ने, कलाकार र पत्रकारबीच विवाद ल्याउने प्रयास नगर्नेलगायतका सहमति भएको छ । सुवेदीलाई कारबाही गर्न भनी यसअघिका उजुरबाजुर सबै फिर्ता गर्ने सहमति भएको छ ।

नायिका पूजा शर्माले पत्रकार प्रकाश सुवेदीले टेलिभिजनमा मुखले होइन, लिखित माफी माग्नुपर्ने अडान लिएकी थिइन् । पत्रकार सुवेदीले भने आफूले बोलेका वाक्यले आत्मसम्मानमा चोट पुग्न गए माफी चाहन्छु भनेका थिए ।