विराटनगर । विराट मेडिकल कलेजले उपचारका क्रममा लागेको खर्च नतिरेको भन्दै एक कोरोना संक्रमितको शव परिवारलाई दिएको छैन । तीन दिनसम्म पनि कोरोना संक्रमणका कारण मृत्यु भएका एक पुरुषको शव आफन्तलाई अस्पतालले नबुझाएको हो ।

शनिबार बिहान उपचारका क्रममा मृत्यु भएका विराटनगर ३ का ६५ वर्षीय तामाङ थरका पुरुषको शव उपचारमा लागेको शुल्क नतिरेको भन्दै अस्पतालले नदिएको आफन्तले बताए । मृतक पुरुषलाई ६ कात्तिकमा विराट मेडिकल कलेजमा भर्ना गरिएको थियो । शनिबार बिहान करिब ८ बजे उनको मृत्यु भएको थियो ।

मृतकका परिवारले अस्पताल भर्ना गर्दा अस्पतालमा एक लाख रुपैयाँ डिपोजिट गरेको र आफु संग बाँकी पैसा नभएको दुखेसो गरेका छन् ।

अस्पतालले ३ लाख ८४ हजार ९३५ रुपैयाँ बाँकी रहेको र त्यो नबुझाएसम्म शव नदिने बताएको मृतकका परिवारले बताए ।

जिल्ला प्रशासन कार्यालय मोरङले भने कतैबाट पनि शव नदिएको उजुरी नआएको बताएको छ । तामाङको अवस्था गम्भिर बनेपछि भेन्टिलेटरमा राखेर उपचार गर्ने क्रममा मृत्यु भएको अस्पतालका प्रशासन प्रमुख सुधिरसिंह राठोरले बताए ।