ताप्लेजुङ । सरकारले ताप्लेजुङको सुकेटार विमानस्थलको नाम परिवर्तनका गरेकोमा जिल्लाका राजनीतिक दलहरुले आपत्ति जनाएका छन् ।
सरकारले ताप्लेजुङको पहिचान र इतिहाँस माथी आक्रमण गर्न खोजेको भन्दै जिल्लाका ७ राजनीतिक दलले आइतबार विज्ञप्ति निकाल्दै आपत्ति जनाएका हुन ।
‘विकास र नामाकरणका नामा स्थानीय जनताको मौलिकतामाथी हुने हस्तक्षेप कुनै हालतमा स्वीकार गर्न सकिदैन,’ विज्ञप्तिमा भनिएको छ ‘यसलाई समयमा सच्याउन सरकार सँग माग गर्दछौँ ।’
आइतबार नेकपा एमाले, नेकपा माओवादी केन्द्र, नेपाली काँग्रेस, जनता समाजवादी पार्टी, राष्ट्रिय प्रजातन्त्र पार्टी, राष्ट्रिय जनमुक्ति पार्टी र संघिय लिम्बूवान मञ्च नेपालले संयुक्त रुपमा विज्ञप्ती जारी गरेका हुन् ।
उनिहरुले सरकारको यो निर्णयलाई नसच्याएमा शसक्त प्रतिरोध गर्ने समेत जनाएका छन् । सरकारले शनिबार बजेट सार्वजनिक गर्दै सुकेटार विमानस्थलको नाम परिवर्तन गरि रवीन्द्र अधिकारी विमानस्थल नामाकरण गर्ने जनाएको थियो ।
हेलिकप्टर दुर्घटना क्षेत्रमा रवीन्द्र स्मृति पार्क बनाउने विषयमा सहमति जनाएका ताप्लेजुङका राजनीतिक दल र नागरिकले यो निर्णयले रबीन्द्र अधिकारीको समेत अपमान भएको बताउँदै आएका छन् ।