काठमाडौं । गृहमन्त्री सुधन गुरुङले खाएको अम्लेटमा माछाको काँडा भेटिएपछि चितवनस्थित एक होटेलका कुक (भान्छे) र होटेल म्यानेजरलाई प्रहरीले नियन्त्रणमा लिएको छ।

प्रशासन विशेष ब्युरो स्रोतका अनुसार गृहमन्त्री गुरुङले चितवनस्थित एक होटलमा नास्ताका रूपमा अम्लेट खाइरहेका बेला त्यसमा माछाको काँडा भेटिएको थियो। गृहमन्त्रीकै थालमा उक्त वस्तु भेटिएपछि घटनालाई गम्भीर रूपमा लिँदै प्रशासनले होटेलका कुक र जनरल म्यानेजर (जीएम) लाई सोधपुछका लागि नियन्त्रणमा लिएको जनाएको छ।

यद्यपि, केही समयपछि गृहमन्त्री गुरुङ स्वयंले घटनालाई लिएर आवश्यक जरिवाना गरी सम्बन्धित व्यक्तिहरूलाई छाड्न निर्देशन दिएपछि सोही प्रक्रिया अघि बढाइएको स्रोतको भनाई छ। हाल उनीहरूलाई खाद्य स्वच्छता र उपभोक्ता सुरक्षासम्बन्धी प्रचलित कानुनअनुसार जरिवाना गर्ने तयारी भइरहेको छ।

गृहमन्त्री गुरुङ राष्ट्रिय स्वतन्त्र पार्टी ९रास्वपा० को महाधिवेशनमा सहभागी हुन चितवन पुगेका छन्। उनी विमानस्थल नजिकै रहेको एक होटलमा बसेका बेला उक्त घटना भएको जनाइएको छ।

पछिल्लो समय होटेल तथा रेस्टुरेन्टमा खाद्य सामग्रीको गुणस्तर, सरसफाइ र पकाउने प्रक्रियामा हुने लापरवाहीका घटनाप्रति उपभोक्ताको गुनासो बढ्दै गएको छ। भान्साको सरसफाइ, पुनः प्रयोग गरिने तेल, म्याद नाघेका सामग्री तथा अर्डरअनुसारको परिकार नपस्किने जस्ता विषय बेलाबेला सार्वजनिक हुँदै आएका छन्।

उपभोक्ताको स्वास्थ्यसँग प्रत्यक्ष जोडिएका यस्ता विषयमा सम्बन्धित निकायले नियमित अनुगमन र कडा कारबाही गर्नुपर्ने माग पनि उठ्दै आएको छ।