सुनसरी । जिल्ला प्रशासन कार्यालय सुनसरीले इटहरी उपमहानगरपालिका-६ स्थित संवेदनशील क्षेत्रमा अनिश्चितकालीन कर्फ्यु आदेश जारी गरेको छ।

स्थानीय प्रशासन ऐन, २०२८ को दफा ६(क) बमोजिम २०८३ साउन ११ गते राति ९:०० बजेदेखि अर्को सूचना जारी नभएसम्म तोकिएको क्षेत्रमा सर्वसाधारणको आवतजावतमा रोक लगाइएको हो।

आदेशमा कर्फ्यु अवधिभर तोकिएको क्षेत्रभित्र कुनै पनि व्यक्तिलाई हिँडडुल, प्रदर्शन, सभा, भेला वा अन्य गतिविधि गर्न नपाइने उल्लेख गरिएको छ।

प्रशासनले आदेश उल्लंघन गर्ने व्यक्तिलाई प्रचलित कानुनअनुसार एक हजार रुपैयाँसम्म जरिवाना वा एक महिनासम्म कैद, वा दुवै सजाय हुन सक्ने चेतावनी दिएको छ।

कर्फ्यु लागू गरिएको क्षेत्र:
पूर्व: इटहरी उपमहानगरपालिका-३ र ६ को सीमा (महेन्द्र राजमार्गअन्तर्गतको घोपाली टोल)
पश्चिम: कोशी ब्यारेजको पुल
उत्तर र दक्षिण: महेन्द्र राजमार्गदेखि २०० मिटर क्षेत्रभित्र

जिल्ला प्रशासन कार्यालयले सुरक्षा अवस्था र सार्वजनिक शान्ति कायम राख्न कर्फ्यु आदेश जारी गरिएको जनाएको छ।