काठमाडौँ । टीकापुर हत्याकाण्ड मुद्दामा तीन तहकै अदालतबाट दोषी ठहर भई जन्मकैदको सजाय पाएका रेशम चौधरीलाई आममाफी दिने तत्कालीन सरकारको निर्णयविरुद्ध परेको रिटमा सुनुवाइका लागि पेसी तोकिएको छ ।

सर्वोच्च अदालतका न्यायाधीशद्वय हरिप्रसाद फुयाँल र नृपध्वज निरौलाको संयुक्त इजलासमा उक्त रिटको पेसी तोकिएको हो । साढे दुई वर्षदेखि सुनुवाइ हुन नसकेको रेशमको आममाफीविरुद्धको रिटलाई अग्राधिकारमा राखेर सुनुवाइका लागि पेसी तोकिएको हो ।

टीकापुर हत्याकाण्डमा मारिएका प्रहरी निरीक्षक केशव बोहराकी श्रीमती शारदा कडायतले रेशमले आममाफी पाएको भोलिपल्ट अर्थात् २०८० जेठ १६ गते सरकारको निर्णयविरुद्ध सर्वोच्च अदालतमा रिट दायर गरेकी थिइन् ।

उक्त रिटमा २०८० जेठ २३ गते न्यायाधीश प्रकाशमान सिंह राउतको एकल इजलासले कारण देखाऊ आदेश जारी गर्दै अग्राधिकार दिएको थियो । सरकारका विभिन्न निकायले २०८० साउन ८ गतेभित्रै सर्वोच्च अदालतमा लिखित जवाफ पेस गरेका थिए ।

तर, लिखित जवाफ पेस भएको लामो समय बितिसक्दा पनि उक्त मुद्दा सुनुवाइमा आउन सकेको थिएन । कारण देखाऊ आदेश जारी भएको साढे दुई वर्षपछि पहिलोपटक रिटको सुनुवाइका लागि पेसी तोकिएको हो ।